新年伊始，先祝大家新年快樂，搵多些錢，唔做傻佬。放假期間，撞到文化A。我響佢面前拋書包，猛講早排去香港藝術館睇潘高壽畫展，俾佢笑曰：潘天壽呀，傻佬！ 臉都紅晒。
文化A其實經常同唔同人談合作。原來依家潮流興搞農業。為推廣之，一些大哥級人士四圍找文化人幫手搞宣傳。
我說：香港搞農業？唔係嘛？十四樓養牛牛？
文化A曰：傻佬，你估我成日聽到甚麼？原來係同隻狼有關。早輪同班大哥吹水，有人經常盛讚隻狼。我都唔知點解，問多一些，原來狼先生一早同班搞農務的大哥們拜晒票，鞠晒躬。而且，仲唔止一次，而係呢幾年定期咁傾，討論香港農業。
我說：呢班大哥，個個身光頸靚，唔似耕田噃？
文化A說：話你傻，無講錯。班大哥點會同你落田啦。因為香港鄰近地區人士，有錢了，想食安全食品。大哥們於是同鄉紳合作，齊齊搵錢，響香港搞農業，賣去大陸。鄉紳都支持，因為依家班八十後如狼似虎，日日望實城規會，個個新界project都抗議，拖到死晒。鄉紳話，與其任由土地丟空，不如租出去俾人務農。依家最大的阻力係政府，因為政府由醫生主導，嫌農業污糟，叫農夫著到好似楊利偉上太空嘅look落田，個農你去務啦！所以，搞農業的大哥，希望下屆新特首，由上而下打救。就係咁，隻狼就乘虛而入了，傻佬！ 網上潮流雜誌
網上推廣
沒有留言:
張貼留言